LEYTE, Philippines – Nakitaan ng Pyrodinium bahamense ang mga sample ng seawater mula sa Carigara Bay, ayon sa Bureau of Fisheries and Aquatic Resources (BFAR) nitong Martes.
Ang mga positibong sample ay mula sa karagatang sakop ng Babatngon, San Miguel, Capoocan, Barugo at Carigara sa Leyte.
Ang Pyrodinium bahamense ay isang toxic microorganism na karaniwang nauugnay sa red tide at maaaring magdulot ng paralytic shellfish poisoning (PSP).
Dahil dito, patuloy na minomonitor ng mga awtoridad ang mga apektadong lugar at pinaalalahanan ang mga coastal community at mamimili na sundin ang mga umiiral na shellfish safety advisory.
Ang red tide ay nangyayari kapag mabilis dumami ang ilang microscopic algae sa dagat, kabilang ang mga dinoflagellate na gumagawa ng toxins. Naiipon ang mga lason sa filter-feeding shellfish tulad ng tahong, talaba at halaan.
Ang pagkain ng kontaminadong shellfish ay maaaring magdulot ng pamamanhid, pagsusuka, hirap sa paghinga at, sa malalang kaso, pagkamatay.
Nilinaw na ang pagkakaroon ng microorganism sa seawater ay hindi nangangahulugang lason mismo ang tubig. Pangunahing panganib ang pag-iipon ng toxins sa shellfish at iba pang lamang-dagat na kinakain.
Patuloy na kumokolekta at sumusuri ang BFAR ng seawater at shellfish samples. Pinayuhan ang publiko na hintayin at sundin ang opisyal na abiso ng BFAR bago mangolekta o kumain ng shellfish mula sa mga apektadong lugar.
Magsasagawa pa ng monitoring upang matukoy kung sapat ang toxin levels sa shellfish para magpatupad ng shellfish ban o iba pang restriction. RNT/MDS
