MANILA, Philippines – Isinilbi ang arrest warrant laban kay United People’s Initiative (UPI) convenor at retired major general Romeo Poquiz sa Ninoy Aquino International Airport sa Pasay City nitong Lunes, Enero 5.
Si Poquiz ay dumating sa paliparan mula sa isang bakasyon sa Bangkok, Thailand.
“Dumating ‘yung eroplano natin coming from Thailand is 8:11 a.m., 8.30 a.m. ‘yung expected natin na dating niya, kaso napaaga ‘yung dating ng eroplano,” sinabi ni Criminal Investigation and Detection Group – National Capital Region (CIDG-NCR) chief Police Colonel John Guiagui.
“Binasahan natin siya ng Miranda Rights niya. Pinaalam natin ‘yung warrant of arrest for inciting to sedition, which was ang nagbigay nito is ‘yung sa Quezon City Regional Trial Court 77,” dagdag pa ni Guiagui.
Ang arrest warrant na isinilbi ng pulisya laban kay Poquiz ay may kaugnayan sa kasong sedisyon na inihain laban sa kanya dahil sa partisipasyon nito sa kilos-protesta sa People Power Monument sa Quezon City noong Nobyembre 16 at 17. RNT/JGC
