KORONADAL CITY- Nauwi sa madugong trahedya ang drag racing ng apat na rider na ikinasawi ng isa matapos nitong paliparin ang motorsiklo hanggang sa sumalpok sa pick-up truck, kahapon ng hapon sa lungsod na ito.
Kinilala ang nasawi na si Jonell Sepillo, 22-anyos at residente ng Barangay Carpenter Hill, Koronadal City.
Ayon kay PSMSGT Fely, imbestigador ng Koronadal City Police Traffic Section, naganap ang aksidente sa national highway na sakop ng Purok Maligaya, Barangay Carpenter Hill, ng naturang lungsod.
Lumabas sa imbestigasyon ng pulisya, bago ang insidente ay nakipagkarera ang biktima kasama ang tatlo pang rider mula Barangay Sarabia.
Pagdating sa naturang lugar ay bigla na lamang sumalpok si Sepillo sa pick-up truck na minamaneho ni Virgilio Hemoto, 52, residente ng Barangay Zone 3, Koronadal City.
Sa lakas ng pagkakasalpok ay tumilapon ang biktima sa sementadong kalsada at nagtamo ng matinding pinsala sa ulo. Sa halip na tulungan ng tatlong rider si Sepillo, mabilis na sumibat ang mga ito patakas.
Dinala naman sa ospital ang biktima para lapatan ng lunas subalit idineklara na rin itong patay ng umatending doktor. Mary Anne Sapico
