Rollback sa presyo ng langis inaasahan dahil sa US-Iran ceasefire

MANILA, Philippines – Posibleng bumaba ang presyo ng langis sa susunod na linggo matapos ang mahigit isang buwang sunod-sunod na pagtaas dulot ng tensyon sa Middle East, kasunod ng dalawang linggong tigil-putukan ng Estados Unidos at Iran.

Ayon sa oil industry source, bumaba ang MOPS (Mean of Platts Singapore) prices at premiums dahil sa ceasefire agreement.

Batay sa unang tatlong araw ng trading, inaasahang rollback ang mga sumusunod:

• Diesel: ₱2.50 hanggang ₱3.40 kada litro

• Gasoline: humigit-kumulang ₱1.00 kada litro

Gayunman, maaari pang magbago ang mga presyong ito depende sa trading hanggang Abril 10.

Sinabi rin ng source na may bahagyang pagtaas muli sa ilang projections.

Nagkasundo sa ceasefire ang US at Iran bago ang deadline na ibinigay ni US President Donald Trump upang buksan muli ang Strait of Hormuz, na dinadaanan ng malaking bahagi ng suplay ng langis sa mundo.

Bilang kapalit, pumayag ang Iran na ihinto ang mga pag-atake at payagan ang ligtas na daloy ng langis at gas.

Samantala, sinabi ni Pangulong Ferdinand “Bongbong” Marcos Jr. na sasamantalahin ng Pilipinas ang dalawang linggong tigil-putukan upang masiguro at madagdagan ang suplay ng petrolyo sa bansa.

Umaasa rin ang pamahalaan na mapapalawig pa ang ceasefire kung magpapatuloy ang maayos na negosasyon. RNT/MND