MANILA, Philippines – Ayaw umano ni dating Pangulong Rodrigo Duterte na makialam si dating tagapagsalita na si Harry Roque sa kanyang kaso sa International Criminal Court (ICC), ayon sa kanyang abogado na si Nicholas Kaufman.
Sinabi ni Kaufman na itinuturing na “fugitive” si Roque sa Pilipinas at nangangamba si Duterte na maaaring maapektuhan ang kanyang depensa sa ICC.
“The former President has expressed no desire to see Harry Roque nor to be assisted by him,” pahayag ni Kaufman.
Kinuwestiyon din ng abogado ang umano’y hakbang ni Roque na kumuha ng lokal na abogadong Dutch para kasuhan ang gobyerno ng Netherlands—na tinawag niyang “lunacy” o kabaliwan. Naudlot umano ito matapos niyang kontakin ang naturang abogado.
Mariing itinanggi ni Roque ang mga paratang. “There is no truth that I have interfered in the case… I thus offered an additional legal remedy, outside of the ICC,” ayon sa kanyang post sa Facebook.
Dagdag pa niya, layunin lamang niyang makabalik si Duterte sa Pilipinas nang buhay at hindi dapat ituring na “crazy scheme” ang kanyang mga mungkahi. RNT
