MANILA, Philippines – Ibinabala ng Philippine Atmospheric, Geophysical and Astronomical Services Administration (PAGASA) ang posibleng pagkakaroon ng flash flood o landslide sa ilang bahagi ng Mindanao dahil sa trough o extension ng low pressure area (LPA) sa labas ng area of responsibility ng bansa.
Sinabi ng PAGASA na ang Davao Oriental, Davao de Oro, Davao Occidental, at Sarangani ay magkakaroon ng maulap na kalangitan na may kalat-kalat na pag-ulan at pagkidlat-pagkulog.
Samantala, mababang tsansa ng pag-ulan ang aasahan sa silangang bahagi ng Northern at Central Luzon dahil sa tagaytay ng high pressure area—isang anti-cyclone weather system.
Sinabi rin ng PAGASA na ang Metro Manila at ang nalalabing bahagi ng bansa ay magkakaroon ng bahagyang maulap hanggang sa maulap na papawirin na may pulu-pulong mga pag-ulan o pagkidlat-pagkulog dahil sa mga localized thunderstorms.
Nagbabala ito sa publiko sa mga biglaang pagbaha o pagguho ng lupa na maaaring mangyari sa panahon ng matinding bagyo. Santi Celario