MANILA, Philippines- Nilinaw ng Metropolitan Manila Development Authority (MMDA) na exempted ang rumerespondeng emergency vehicles tulad ng ambulansya, fire trucks, at police units mula sa No Contact Apprehension Policy (NCAP).
Sinabi ng ahensya sa Facebook page nito na, “Paglilinaw ng Metropolitan Manila Development Authority (MMDA) exempted sa huli ang mga emergency vehicles tulad ng ambulansya, fire trucks, at police units sa lahat ng uri ng traffic violations na rumeresponde sa emergency.”
“Kapag hindi reresponde sa emergency ay hindi dapat lumabag sa batas trapiko ang mga emergency vehicles,” anito pa.
“Muling paliwanag ng MMDA, sa ilalim ng NCAP kapag ang isang emergency vehicle ay tumawid kahit naka-red light na nakita sa CCTV cameras pati na ang mga ordinaryong sasakyan na nagbigay daan sa emergency vehicle ay hindi makakatanggap ng notice of violation.”
Binigyang-diin din ng MMDA ang pangangailangang tiyaking lehitimo ang isang emergency vehicle.
“Kailangan din siguraduhin na lehitimo na emergency vehicle talaga ang sasakyan dahil meron nang insidente noon na isang service ng funeraria ay nilagyan ng tatak na ambulance,” giit nito. RNT/SA
