MANILA, Philippines – IPINAHAYAG ng Bureau of Immigration (BI) na ang Russian national at kontrobersyal na YouTuber na si Vitaly Zdorovetskiy ay inilipat na sa kustodiya ng Bureau of Jail Management and Penology (BJMP).
Kinumpirma ni BI Commissioner Joel Anthony Viado na si Zdorovetskiy ay inilipat sa BJMP noong Hunyo 11 habang siya ay nahaharap sa mas maraming lokal na kaso sa Pilipinas.
Kinumpirma ni Viado na mananatili si Zdorovetskiy sa kustodiya ng BJMP hanggang sa pagresolba ng kanyang mga kaso sa korte, bago siya ibalik sa BI para sa deportasyon.
Kinumpirma din ng BI na dati nang humiling si Zdorovetskiy para sa pansamantalang pagpapalaya sa pamamagitan ng piyansa, ngunit binigyang-diin ng ahensya na hindi nila ito pinagbigyan.
Sa isang dokumentong isinumite sa BI, sinabi ni Zdorovetskiy na wala siyang intensyon na iwasan ang deportasyon, at nangako na manatili sa loob ng National Capital Region. Sinabi rin niya na agad niyang isusumite ang sarili sa BI custody sakaling may mailabas na deportation order laban sa kanya.
Kinumpirma ni Viado ang pagtanggap ng kahilingan ni Zdorovetskiy ngunit nilinaw na hindi ibibigay ng BI ang kanyang apela.
“This is not just a matter of administrative procedure—it is about protecting the integrity of our immigration laws,” giit ni Viado.
“Foreign nationals who abuse our hospitality and violate our laws must face the consequences. The Bureau is resolute: we will not allow our deportation process to be undermined by publicity tactics or legal maneuvering. No special treatment will be given,” dagdag pa ng opisyal.
Si Zdorovetskiy, isang content creator na kilala sa paggawa ng mga offensive prank videos at pagkakaroon ng problemang pag-uugali sa panahon ng kanyang pananatili sa Pilipinas, ay nahuli noong Abril kasunod ng mga ulat ng mga paglabag sa imigrasyon.
Muling iginiit ng BI na ang mga dayuhang maninira sa kaayusan ng publiko ay sasailalim sa deportasyon sa ilalim ng batas ng Pilipinas. JAY Reyes
