SAMAR, Philippines – Muling ipatutupad ng pamahalaang panlalawigan ng Samar ang regular na limang araw na pasok sa trabaho simula Lunes, Mayo 18, matapos ang ilang buwang pagpapatupad ng compressed four-day workweek.
Inilabas ni Governor Sharee Ann Tan ang Executive Order No. 16-2026 noong Mayo 15 na nag-uutos sa lahat ng tanggapan at empleyado ng probinsya na bumalik sa regular na Monday-to-Friday schedule.
Naunang ipinatupad ng Samar ang four-day workweek bilang hakbang sa pagtitipid dahil sa mataas na presyo ng langis at gastusin sa transportasyon dulot ng global oil supply crunch. Layunin nitong mabawasan ang operational costs ng mga opisina at makatulong sa mga empleyado at residenteng bumibiyahe papunta sa provincial offices sa Catbalogan City.
Ayon sa provincial government, ibinabalik na ang regular na workweek dahil mas maayos na ang fuel supply at normal na muli ang operasyon ng mga tanggapan. Inaasahan ding mas mapapadali ang pag-access ng publiko sa serbisyo ng gobyerno at mas mapapalakas ang koordinasyon ng mga opisina.
Ang Samar ang ikalawang probinsya sa Eastern Visayas, kasunod ng Northern Samar, na nagbalik sa regular na limang araw na pasok. Ikalima rin itong local government unit sa rehiyon na gumawa nito, kabilang ang Abuyog na nauna nang nagbalik sa normal na operasyon.
Sinabi ni Gov. Tan na ang pagbabalik sa regular na schedule ay bahagi ng layunin ng pamahalaan na magbigay ng mas episyente at mabilis na serbisyo publiko sa ilalim ng “One People, One Samar” governance agenda.
Pinayuhan na rin ang mga residente at empleyado na tandaan ang pagbabago ng schedule dahil magsisimula na ang normal na operasyon ng lahat ng provincial offices sa Mayo 18. RNT/MND
