MANILA, Philippines – Nagpasok ng not guilty plea ang Sandiganbayan noong Lunes para kay dating Senador Ramon “Bong” Revilla Jr. matapos itong tumangging magpasok ng plea sa graft case na kaugnay ng umano’y ghost flood control project sa Pandi, Bulacan. Ang kaso ay dinidinig ng Fourth Division ng anti-graft court.
Samantala, ipinagpaliban ng Third Division ang arraignment sa kasong malversation laban kay Revilla at accountant na si Juanito Mendoza hanggang Pebrero 16, habang hinihintay ang desisyon sa kanilang motions for reconsideration. Naghain din si Revilla ng motion for inhibition laban kay Associate Justice Karl Miranda, na kapatid ng abogado ng isang government witness.
Ang Third Division rin ang naglabas ng arrest at hold departure order noong Enero 19 laban kay Revilla at anim pang dating opisyal at empleyado ng DPWH Bulacan First District Engineering Office. Ang iba pang akusado—sina Brice Hernandez, Jaypee Mendoza, Arjay Domasig, Emelita Capistrano-Juat, at Christina Mae del Rosario-Pineda—ay nagpasok na ng not guilty plea.
Sa kanyang motion for inhibition, iginiit ni Revilla na si Justice Miranda ay kapatid ng abogado ni dating DPWH Usec. Roberto Bernardo, na tumestigo tungkol sa umano’y paghingi ng pondo para sa flood control projects. Ayon sa tagapagsalita ni Revilla na si Atty. Francesca Señga, “If you recall, Usec. Bernardo testified there. The rules state that you should not only be impartial but also have the appearance of impartiality. This means you must show—or give the impression—that you are not favoring anyone.”
Ipinaliwanag naman ni Justice Miranda na naihayag na niya ang naturang relasyon at sinabi, “There are no grounds for my mandatory inhibition… Nevertheless, I’d like to inform everyone that the motion for inhibition will be studied with the utmost care and resolved as soon as possible to determine if I should inhibit myself, keeping in mind that public confidence in the administration of justice must at all times be preserved.”
Nagpiyansa na si Revilla ng P90,000 para sa graft case ngunit mananatili siyang nakakulong dahil nonbailable ang kasong malversation. Ayon sa Office of the Ombudsman, ang mga akusado ay umano’y nagsabwatan para mailabas ang P76 milyon bilang bayad sa P92.8-milyong flood control project na kalauna’y natuklasang hindi naman naipatupad kahit idineklarang tapos na. RNT/MND
