MANILA, Philippines- Maaring mag-takeover ang Department of Energy (DOE) sa operasyon ng oil industry sa mga panahon ng emergency.
Ito ang idineklara ng Supreme Court (SC) sa 36 na pahinang desisyun na pinonente ni Associate Justice Marvic Leonen.
Inihayag ng Korte na constitutional ang Section 14 (e) ng Republic Act 8479 o ang Downstream Oil Industry Deregulation Act of 1998 na nagbibigay kapangyarihan sa DOE na mag-takeover sa operasyon ng private entities sa oil industry salig sa ilang kondisyon.
Nakasaad sa probisyon na “in times of national emergency, when the public interest so requires, the DOE may, during the emergency and under reasonable terms prescribed by it, temporarily take over or direct the operation of any person or entity engaged in the Industry.”
Binaligtad ng SC ang 2013 decision ng Court of Appeals’ (CA) Ninth Division na nagsabing unconstitutional ang naturang probisyon.
Binigyan-bigat ng SC ang argumento ng mga petitioner na pinangunahan ng Executive Secretary ni dating Pangulong Gloria Macapagal Arroyo na si Leandro Mendoza at DOE-Department of Justice (DOE-DOJ) Joint Task Force. Iginiit ng mga petitioner ang kapangyarihan na tukuyin ang pagkakaroon ng national emergency ay nasa kamay ng Pangulo.
Ang desisyon ng SC ay ibinatay sa Article XII, Section 17 ng Constitution kung saan may kapangyarihan ang Pangulo na sakupin ang privately owned public utilities o businesses na makaaapekto sa interes ng publiko.
“In other words, the President may carry out their functions through the heads of the executive departments.”
Nag-ugat ang kaso nang kwestiyunin ng Pilipinas Shell at Petroleum Corporation sa Makati RTC ang EO 839 ni Arroyo na nag-aatas sa oil industry players na panatiliin ang presyo ng kanilang petroleum products bunsod ng bagyong “Ondoy” at “Pepeng” taon 2009. Teresa Tavares
