MANILA, Philippines- Ipinahayag ng Civil Service Commission (CSC) na available na online ang mga school assignments at mahahalagang paalala para sa mga kukuha ng Career Service Examination-Pen and Paper Test (CSE-PPT) na gaganapin sa Linggo, Marso 3, 2024.
Inirekomenda ni CSC Chairperson Karlo Nograles na sumangguni ang mga examinees sa Examination Advisory No. 4, s. 2024, na makukuha sa website ng CSC, upang magarantiya ang tuluy-tuloy na pagsasagawa ng pagsusulit sa 16 na CSC testing centers sa buong bansa.
“We urge the 361,699 individuals expected to take the CSE-PPT to check and familiarize themselves with their school assignments and Examinee’s Guide available through the Online Notice of School Assignment (ONSA) ahead of time. Ayaw nating masayang ang ating application at pagre-review dahil sa hindi paghahanda at pagdadala ng mga kinakailangang gamit sa araw ng exam,” ani Chairperson Nograles.
Nabatid sa CSC, upang magamit ang ONSA, dapat maipasok ng mga examinees ng tama ang mga kinakailangang impormasyon sa mga itinalagang field ng data, kasunod ng tamang format. Kung sila ay nahihirapan sa pag-access sa ONSA at mananatiling walang kamalayan sa kanilang achool assignments isang linggo bago ang petsa ng pagsusulit, pinapayuhan ang mga examinees na direktang magtanong sa CSC Regional o Field Office na may kinalaman para sa tulong.
Binigyang-diin din ni Chairperson Nograles ang kahalagahan ng pagdating sa testing venue sa araw ng pagsusulit nang hindi lalampas sa 6:30 a.m., o gaya ng tinukoy ng mga kaukulang CSC Regional o Field Offices. Ang mga gate ng testing venue ay isasara sa mga examinees sa ganap na 7:45 a.m., at ang mga late na dumating ay hindi papayagang kumuha ng exam.
Ayon sa CSC, mahigpit na ipapatupad ng CSE-PPT ang patakarang “No ID, No Exam”. Ang mga kukuha ng pagsusulit ay kinakailangang magpakita ng isang balidong ID card sa araw ng pagsusuri, mas mabuti ang parehong ID card na ginamit sa proseso ng aplikasyon. Bukod pa rito, tanging mga itim na bolpen lamang ang pahihintulutan na gamitin sa panahon ng pagsusulit.
Pinayuhan naman ang mga examinees na magsuot ng maayos na kasuotan, mas mainam na mga plain white shirt o tops, at gumamit ng transparent na bag sa araw ng pagsusulit. Mahigpit na ipinagbabawal ang pagsusuot ng mga sleeveless shirt/blouse, shorts/short pants, tokong pants, ripped jeans, at tsinelas. Dapat ding nakatali ang mahabang buhok, habang opsyonal ang pagsusuot ng face mask.
Ayon pa sa CSC, ang CSE-PPT Professional Level ay may limitasyon na tatlong oras at 10 minuto para sa 170-item na pagsusulit, habang ang Subprofessional Level ay binibigyan ng dalawang oras at 40 minuto para sa 165-item na pagsusulit.
Ang kumpletong listahan ng mga paalala at alituntunin ay maaaring ma-access mula sa CSC website sa www.csc.gov.ph. RNT
