LA UNION – Tigok ang isang security guard samantalang sugatan ang kasama nito matapos na bumangga sa puno ng Mahogany ang kanilang motorsiklo sa Brgy. Poblacion, Sto. Tomas ng lalawigang ito kagabi, Agosto 23.
Kinilala ng Sto. Tomas Municipal Police ang driver ng Lucky Star motorcycle na si Ruben Ambalan, 30, walang asawa, security guard, residente ng Brgy. Patac ng naturang bayan.
Nakilala naman ang angkas nito na si Gerry Dela Cruz y Ambalan, 23, walang asawa, residente ng Brgy. Balaoc, Sto. Tomas, La Union.
Bumibiyahe patungong kanlurang direksyon sa provincial road sa naturang lugar ang motorsiklo. Pagdating nito sa pinangyarihan ng insidente, na-miskalkula ng driver sa pagmamaneho hanggang sa bumangga ang motorsiklo sa Mahogany tree sa gilid ng kalsada.
Resulta nito, parehong sugatan ang driver at ang angkas nito na agad na isinugod sa La Union Medical Center ng mga rumespondeng BFP personnel.
Gayunman, ang driver ng motorsiklo ay idineklarang dead-on-arrival ng umatending doktor. Rolando S. Gamoso
