Home Banat By SEN. BATO NALIGTAS SA DISGRASYA SA ERE

SEN. BATO NALIGTAS SA DISGRASYA SA ERE

MAITUTURING na bagong buhay ang pagkakaiwas sa kamatayan ni Senador Ronald “Bato” dela Rosa kaugnay ng bumagsak na helikopter sa Guimba, Nueva Ecija.

Kung nagkataon, kasunod sana nito si Police Colonel Pergentino Malabed Jr. na nasawi kamakailan sa United States nang magbanggaan ang isang American Airlines at isang Black Hawk military helikopter.

Kinumpirma mismo ni Sen. Bato na siya at dalawa niyang security aide ang sakay ng helikopter na piniloto ni Captain Julia Flori Po papuntang Baguio City kamakailan.

Kwento niya, naisip niyang sasakay muli sa nasabing helikopter papunta naman sa Binmaley, Pangasinan ngunit sa huli pinauwi na lang niya si Po at magbibiyahe na lang siya gamit ang sasakyan patungo sa Pangasinan.

Makaraan nito, wala na siyang balita mula sa kay Po at sa helikopter at huli na nang malaman niyang nadisgrasya na pala ito.

Sinubukang iligtas ng mga naunang mamamayang sumaklolo si Po at isang residente sa lugar ang nagsabing pinutol pa nila ang seatbelt para ito iahon ngunit patay na ito sa mahigit kataong lalim ng tubig na pinagbagsakan ng helikopter.

SINO ANG HINDI KAKABAHAN?

Batay sa mga nagaganap sa mga eroplano at helikopter ngayon, hindi ka ba kakabahan kung mahilig kang magbiyahe gamit ang mga sasakyang himpapawid na ito?

Aba, mga Bro, sunod-sunold ang mga disgrasya sa mga ito.

Bago magkatapusan ang taon, 179 sa 181 na pasahero at crew ang namatay sa nag-emergency landing na Jeju Air sa Muan Airport sa South Korea.

Sumunod dito ang pagkasunog naman ng Busan Air sa Gimhae International Airport sa Busan, South Korea.

Mabuti na lang at naligtas lahat ang 176 na pasahero, kasama ang pitong crew nito.

Makaraan nito, nagbanggaan naman ang isang American Airlines at ang Black Hawk sa ere at namatay lahat ang 67 pasahero at crew ng dalawang sasakyan.

Natagpuan ang dalawang sasakyan sa gitna ng Potomac River at naging pahirapan ang rescue operations hanggang sa ideklara ng mga awtoridad na walang nakaligtas, kasama na si P/Col. Malabed.

Matapos nito, bumagsak naman ang isang medical plane sa Philadelphia sa US pa rin matapos itong mag-dive mula sa ere, bumangga sa isang gusali at nagliyab na lumikha ng sunog sa mga gusali at sasakyan.

Patay ang anim na pasahero nito at isa pa na nadamay sa pinagbaqsakan nito.

Kahapon lamang din, nasunog ang pakpak ng isang United Airlines plane sa George Bush Intercontinental/Houston Airport, Texas bago lumipad.

Puno umano ng pasahero ang eroplano ngunit naligtas naman sila sa mabilisang paglabas na isinagawa ng mga awtoridad.

Halos kasabay nito ang isa pang eroplanong nakabanggaan naman ng isang tarmac tug vehicle ngunit sa ibang paliparan naganap.

MAGDASAL AT MAGDASAL

Anoman ang mga dahilan ng mga disgrasya, masasabi nating sa Diyos lang tayo talaga makaaasa na manatiling buhay sa ganitong pangyayari.

Kaya, mga Bro, matuto lahat tayong magdasal.