Sen. Bong ayaw makisawsaw sa isyu ng 2025 Nat’l Budget

MAINIT na sinalubong ng libo-libong residente si Senator Ramon “Bong” Revilla Jr. nang dumalo sa ginawang pamamahagi ng Department of Social Welfare and Development (DSWD) ng
Assistance to Individuals in Crisis Situation o AICS na ginanap sa Amlac Ville Subdivision Covered Court, Barangay Payatas, sa Quezon City nitong Miyerkules ng umaga.

Nabatid na nasa 3,000 mga benepisyaryong residente na kabilang sa pamilya ng mga maralitang mamamayan ang napagkalooban ng tig-2,000 tulong pinansiyal ng DSWD.

Nagtungo si Sen. Revilla kasama sina Quezon City Mayor Joy Belmonte at ilang mga konsehal sa lugar upang sumaksi sa pamamahagi ng pinansiyal na tulong kung saan ibinahagi naman ng mambabatas sa mga residente ang ilan sa kanyang mga naipasang batas na ngayon ay pinapakinabangan na ng mamamayan, lalu na mga guro, estudyante, at senior citizen.

Ilan sa binanggit ng senador ang lifetime validity ng birth certificate at marriage certificate, pagtataas ng “chalk” allowance ng mga guro ng P10,000 mula sa dating P5,000, ang pagbabawal sa no-permit-no-exam policy, at ang Expanded Centenarian Law kung saan tatanggap na ng P10,000 ang mga lolo at lola na aabot sa edad na 80, 85, 90, 95 at P100,000.00 sa pagsapit ng 100-taon.

Pinasalamatan naman ni Alyas “Pogi” Sen. Revilla ang mamamayan ng Quezon City sa patuloy na suportang ipinagkakaloob sa kanya, hindi lamang sa larangan ng pulitika, kundi maging sa kanyang mga pelikula, at TV series, kaya’t ipinangako niya sa mga ito na kahit buhay aniya niya ay itataya niya para sa kanila.

“Nagpapasalamat ako sa nagtitiwala sa atin, basta’t tandaan ninyo ipaglalaban ko kayo mga kababayan,” ani Revilla.

Samantala, sa panayam kay Sen Revilla, tumanggi itong magkomento hinggil sa usapin patungkol sa ipinasang budget ng pamahalaan para sa taong 2025 na lalong nagpainit sa bangayan sa pulitika.

Ayon kay Sen. Revilla, wala siya sa posisyon para magkomento sa ipinasang budget ng pamahalaan dahil hindi naman umano siya miyembro ng bicameral conference committee na nagpanukala sa P6.352 trillion 2025 national budget at ayaw niyang makialam pagdating sa naturang usapin. RNT