MANILA, Philippines – Haharapin nina Senador Jinggoy Estrada at dating Senador Ramon “Bong” Revilla Jr. ang mga kasong plunder kaugnay ng mga flood control infrastructure projects, ayon sa Department of Justice (DOJ) nitong Huwebes.
Ayon kay DOJ spokesperson Polo Martinez, nagsampa ang National Bureau of Investigation (NBI) ng hiwalay na plunder complaints laban kay Revilla at Estrada.
Nauna nang nagsampa ang NBI ng parehong kaso laban kay dating Ako-Bicol party-list Rep. Zaldy Co, na kabilang din sa kontrobersiya sa flood control.
“The high-profile personalities that the public may be interested in are Senator Bong Revilla, Zaldy Co and Senator Jinggoy Estrada,” ani Martinez. Bawat isa sa kanila ay may tatlong hiwalay na kaso ng plunder.
Binanggit sa mga reklamo ang posibleng paglabag sa Anti-Graft and Corrupt Practices Act (RA 3019) at Code of Conduct and Ethical Standards for Public Officials (RA 6713). Isinagawa ang paunang imbestigasyon para kay Co noong Enero 5.
Nagsagawa rin ang DOJ ng paunang imbestigasyon sa anim pang kaso kaugnay ng flood control projects ng Wawao Construction at Topnotch Catalyst Builders, kabilang ang mga reklamo laban kay Revilla at Senador Joel Villanueva.
Itinanggi ni Revilla ang kanyang pagkakasangkot sa umano’y “ghost” o hindi umiiral na proyekto sa Bulacan, habang mariing itinanggi ni Estrada ang akusasyon na tumanggap ng kickbacks. Tinanggihan naman ni Co ang mga paratang laban sa kanya bilang “false.” RNT
