MANILA, Philippines – Nilinaw ng mga senador nitong Huwebes na hindi nila sinusubukang i-intimidate ang China. Ayon sa kanila, ang mga resolusyon at pahayag ng Senado ay naglalayong ipagtanggol ang soberanya ng bansa at himukin ang diplomatikong pag-uusap para maibsan ang tensyon.
Ani Senator JV Ejercito: “We do not want war… We are just standing up for what is right, for what is ours, and protecting our sovereignty.” Binanggit niya na dapat tapusin ang lahat ng diplomatikong paraan at hindi binabanta ang China, bagkus ipinapahayag lang ang paninindigan ng Senado.
Sinabi rin ni Senator Raffy Tulfo na wala siyang narinig na senador na nagbanta sa Chinese Embassy. Tiniyak niya na ang Senate Resolution 256 ay hindi banta kundi pagpapahayag ng paninindigan sa soberanya.
Parehong nanawagan ang mga senador na magkaroon ng direktang diplomatikong pag-uusap sa pagitan ng Philippine at Chinese ambassadors, at isama ang Department of Foreign Affairs, upang maibsan ang tensyon sa West Philippine Sea at maiwasan ang mga hindi pagkakaunawaan. RNT/MND
