MANILA, Philippines – Sakaling mag-convene ang Senado bilang impeachment court na lilitis sa kaso ni Vice President Sara Duterte-Carpio, maaaring magtalaga ng impeachment manager upang matiyak ang maayos na daloy ng paglilitis, ayon kay Senate President Pro Tempore Panfilo “Ping” M. Lacson nitong Miyerkules.
Sa Kapihan sa Senado forum, sinabi ni Lacson na unang kinokonsidera si Sen. Francis Pangilinan para sa posisyon, dahil sa kanyang background bilang abogado.
“We’re planning to appoint an impeachment manager. Baka si Sen. Pangilinan as lawyer,” ani Lacson. “Mas mainam ang lawyer na sanay sa trial para more or less ma-signal si Senate President na an objection would be overruled or sustained.”
Ayon pa sa kanya, iminungkahi ni Senate Majority Leader Juan Miguel Zubiri ang ideya, at si Senate President Vicente Sotto III ay “amenable” dito.
Dagdag ni Lacson, nais ni Sotto na ang impeachment manager ay magsilbing “shepherd” o gabay sa proseso, katulad ng majority leader sa Senado.
“Sabi ni Senate President, puwedeng mag-designate ng impeachment manager na senador. Parang siya mag-shepherd aside from the SP, siya ang bastonero sa floor. Parang de facto majority leader,” aniya.
Samantala, sinabi ni Lacson na ang posibleng impeachment trial ay maaaring tumuloy nang hindi itinitigil ang mga committee hearings at regular na sesyon ng Senado.
Binigyang-diin niya ang pangangailangang ipagpatuloy ang legislative work, kabilang ang committee hearings at plenary sessions, lalo na para sa mga priority measures.
“Ngayon may priority bills. Pag hinto mo, paralyzed ang legislative work,” aniya. Ernie Reyes
