MANILA, Philippines – Binago ni Senador Francis “Chiz” Escudero ang ihip ng hangin sa Senado na naghalal kay Senador Win Gatchalian bilang acting Senate President Pro-Tempore na naging presiding officer sa sesyon.
Sa pagbabagong ito, hindi naman napalitan si Senador Alan Peter Cayetano bilang senate president dahil wala silang 13 na bilang ng senator-present nang buksan ang sesyon.
Bilang simple majority na 12 senador, nahalal si Gatchalian bilang acting Senate President Pro-Tempore, pero hindi maaaring mapalitan si Cayetano dahil kapos sa isang miyembro ang magiging botohan na dapat 13 miyembro ang bomoto sa bagong senate president.
Nailuklok naman bilang Senate secretary si Atty Renato Bantug kapalit ni Jose Luis Montales na nahalal sa pag-upo ni Cayetano. Napalitan din ang hepe ng Office of the Sergeant-At-Arms (OSAA) sa katauhan ni PBGen. Alfred Sotto Corpuz.
Sa loob ng sesyon, sa mosyon ni Senador Vicente Sotto III, nahalal bilang chairman ng committee on rules at majority floor leader si Senador Juan Miguel Zubiri.
Nahalal bilang bagong chairman ng Senate Blue Ribbon committee si Senador Erwin Tulfo, kapalit ni Senador Pia Cayetano na magsasagawa sana ng pagdinig bukas, Huwebes hinggil sa flood control scandal.
Kasabay nito, inatasan din ni Gatchalian ang majority leader at secretariat na ipaalam sa Mababang Kapulungan ang pagkakahalal nito bilang acting Senate president pro-tempore.
Bukod kina Gatchalian, Zubiri, Sotto, Escudero at Tulfo, dumalo sa sesyon sina Senador Bam Aquino, Francis “Kiko” Pangilinan, Risa Hontiveros, JV Ejercito, Panfilo Lacson, Lito Lapid, Raffy Tulfo.
Hindi dumalo sa sesyon sina Cayetano, Robin Padilla, Imee Marcos, Bong Go, Rodante Marcoleta, Joel Villanueva, Loren Legarda, at magkapatid na Mark at Camille Villar.
Sa kabuuan ng pagbabagong ito, ideneklara ng Senado na pawang adjourned ang sesyon ng Senado sa mosyon ni Zubiri.
“Mr. President, I move declared the session of the 20th Congress, first regular session adjourned sine die,” Zubiri. Ernie Reyes (larawan ni Cesar Morales)
