MANILA, Philippines – Posibleng mag-convene ang Senado bilang impeachment court sa Mayo 4 kung maipapasa na ng House of Representatives ang articles of impeachment laban kay Vice President Sara Duterte, ayon kay Senate President Vicente Sotto III.
“Technically, we may convene by May 4—that’s when we should resume. That’s just two weeks away,” ani Sotto.
Dagdag niya, “By May 4, if we receive the articles of impeachment, then we will immediately convene as an impeachment court.”
Ayon kay Sotto, agad niyang aaksyunan ang impeachment sa oras na matanggap ito ng Senado. “I will act on it with dispatch. Definitely forthwith,” aniya.
Gayunman, sinabi niyang wala pang tiyak na timeline dahil nakasalalay pa ito sa desisyon ng House of Representatives kung may probable cause ang mga reklamo.
Dalawang pagdinig na lamang ang natitira sa House committee on justice bago maglabas ng rekomendasyon, na nakatakda sa Abril 22 at 29.
Kabilang sa mga alegasyon laban kay Duterte ang graft and corruption, umano’y maling paggamit ng confidential funds, at betrayal of public trust. Sinusuri rin ang kanyang SALN at yaman.
Kapag inaprubahan ng hindi bababa sa isang-katlo ng mga miyembro ng Kamara, ipapasa ang articles of impeachment sa Senado na siyang didinig at magpapasya kung siya ay mapapatalsik o mapapawalang-sala. RNT/MND
