MANILA, Philippines – Tila hindi mapigilan ng Senate committee on Women, Children, Family Relations and Gender Equality ang pagbawi ng lagda sa committee report sa panukalang anti-teenage pregnancy bill na umiinit ang debate sa Senado matapos tutulan ng ilang religious groups.
Natuklasan na umabot na sa apat na senador ang bumawi sa kanilang lagda sa committee report hinggil sa panukala matapos “matakot” sa pressure ng ilang religious community sa sexuality education provisions.
Sa kanilang liham kay Senate President Francis Escudero na may petsang Enero 21, 2025, binawi ang lagda nina Senador JV Ejercito, Cynthia Villar, Nancy Binay, at Bong Go.
Hiniling nila kay Escudero na bawiin ang kanilang suporta sa report “in light of the recent feedback and numerous concerns.”
“While we believe that the prevalence of adolescent pregnancy is an issue that must be urgently addressed, it is our position that further dialogues with stakeholders is essential, in order to accurately dispel misconceptions and remove objectionable portions from the bill,” anila sa liham.
Kasabay nito, nagpahayag din ng pagtutol si Senador Juan Migiuel “Migz” Zubiri sa panukalang batas na magtuturo ng sex education sa murang edad upang mabawasan ang teenage pregnancy alinsuod sa itinakda ng United Nations.
Sinabi ni Zubiri na “bilang isang konserbatibong mambabatas at magulang, mariin kong tinututulan ang ilang nilalamang probisyon ng Senate Bill No. 1979, in its present form.”
“I am deeply concerned about the provisions on adolescent education, particularly the introduction of sex education at an early age. This proposal does not align with our conservative values as a nation and could have serious repercussions on our youth,” ayon kay Zubiri.
Naniniwala si Zubiri na baka sa halip iwasan ang adolescent pregnancy, baka magkakaroon ng mas maraming adolescent pregnancy sanhi ng experimentation.
“We have seen the effects of liberal sex education policies in other countries, where children as young as six years old are being taught how to use contraceptives and engage in sexual activities,” aniya.
“Ayaw nating mangyari ito sa ating bansa. Dapat nating protektahan ang ating mga kabataan mula sa ganitong uri ng edukasyon na maaaring magdulot ng premature sexual experimentation. We are a conservative society, and our cultural and moral values must be preserved,” paliwanag pa niya.
Ngunit, nilinaw ni Zubiri na kanyang kinikilala ang good intentions ni Senador Risa Hontiveros sa paghahain ng naturang panjkala, at kanyang naiintindihan ang adhikain ng senador na magbigay ng suporta sa teenage mother at tugunan ang adolescent pregnancy.
“However, I firmly believe that we can achieve this without resorting to controversial sex education programs that could do more harm than good,” aniya.
Iginiit pa ni Zubiri na bilang pro-life, pro-family at pro-God legislator, naniniwala siya na dapat panatilihin ang responsibilidad sa sexual education sa magulang at hindi sa paaralan.
“Mas mainam na ang mga magulang ang nagtuturo sa kanilang mga anak tungkol sa ganitong sensitibong usapin, ayon sa kanilang paniniwala at kultur,” ayon kay Zubiri. Ernie Reyes