Signal No. 1 itinaas sa Eastern Visayas, ilang bahagi ng Mindanao sa hagupit ni Wilma

MANILA, Philippines – Dahil sa epekto ng Tropical Depression Wilma, nagtaas ang Philippine Atmospheric, Geophysical and Astronomical Services Administration (PAGASA) ng Tropical Cyclone Wind Signal Number 1 sa silangang bahagi ng Visayas at ilang lugar sa Mindanao noong Huwebes ng umaga.

Ayon sa PAGASA, ang mga lugar sa ilalim ng Signal Number 1 ay makakaranas ng hangin na may bilis na 39 hanggang 61 kilometro kada oras sa loob ng hindi bababa sa 36 oras, na maaaring magdulot ng magaan na pinsala sa mga istruktura.

Mga apektadong lugar sa Visayas:

–Northern Samar

–Eastern Samar

–Samar

–Biliran

–Leyte

–Southern Leyte

Mga apektadong lugar sa Mindanao:

–Surigao del Norte (kabilang ang Siargao at Bucas Grande Islands)

–Dinagat Islands

Magdadala rin si Wilma ng malakas na pag-ulan sa mga susunod na araw:

Aabot sa 100–200 mm na ulan (Huwebes–Biyernes ng tanghali):

–Northern Samar

–Eastern Samar

Aabot sa 50–100 mm na ulan:

–Samar, Biliran, Leyte, Southern Leyte, Cebu, Bohol

–Negros Oriental, Negros Occidental

–Surigao del Norte, Dinagat Islands, Agusan del Norte

–Misamis Oriental, Camiguin

Noong huling tala, si Wilma ay nasa 625 kilometro silangan ng Catarman, Northern Samar, na kumikilos patungong kanluran-timog-kanluran sa bilis na 20 kph. May dalang maximum sustained winds na 45 kph at hampas ng hanggang 55 kph.

Ayon sa PAGASA, inaasahang tatama si Wilma sa Eastern Visayas o Dinagat Islands mula Biyernes ng gabi hanggang Sabado ng umaga at lilipat sa Visayas hanggang Disyembre 8 (Lunes). Pagkatapos, lilipat ito sa Sulu Sea at posibleng tumawid sa hilagang Palawan sa susunod na linggo. RNT/MND