MANILA, Philippines – Asahan na ang bawas-presyo sa singil sa kuryente ngayong buwan.
Sa abiso ng Manila Electric Company (Meralco), asahan ang rollback na P0.3587 (P0.36) sa kada kilowatt-hour (kWh), o overall rate para sa isang typical household sa P11.4295 per kWh ngayong Oktubre, mula sa P11.7882 per kWh noong Setyembre.
Katumbas ito ng P72 na bawas sa kabuuang bill para sa isang tirahang kumukonsumo ng 200 kWh.
Nauna nang sinabi ng Meralco na posible ang bawas-presyo sa singil sa kuryente dahil sa pagbaba ng generation charge sanhi ng mababang Wholesale Electricity Spot Market (WESM) charges dahil naman sa mababang demand.
Ayon sa power distributor, ang overall rate decrease ay dahil sa P0.3059 per kWh na bawas sa generation charge dahil sa mababang WESM costs. RNT/JGC
