Sistema ng pabahay sa Maynila, pinababago ni Lacuna

MANILA, Philippines – INATASAN ni Manila Mayor Honey Lacuna-Pangan ang Sangguniang Panglungsod ng Maynila, sa pangunguna ni VM Yul Servo Nieto at tanggapan ng urban settlements office na baguhin ng sistema ng pabahay sa Lungsod ng Maynila.

Ang nasabing direktiba ni Lacuna ay ipinahayag kasabay ng isinagawang pagpapasinaya sa 20-palapag na Pedro Gil Residences at Pedro Gil Health Center kasama si Vice Mayor Nieto at 5th District Congressman Irwin Tieng.

Ayon kay Lacuna, nais nitong baguhin ang sistema ng pabahay sa lungsod at gawing “rent-to-own” ang condo units na mula sa P2,000 hanggang P3,000 buwanang renta ay mapapasakanila na ang tirahan sa tamang panahon.

“Kung dati ay habang buhay kayong magbabayad ng renta, simula ngayon, ang inyong buwan-buwang hinuhulugan, hindi na po pawang renta lang habang buhay. Ito po ay magiging pabahay na rent-to-own,” ani Lacuna.

Ang Pedro Gil Residences ay dinisenyo ng City Planning and Development Office na layong mabigyan ng de-kalidad na pabahay ang kwalipikadong Manileño na may nakalaang 299 na residential units, 143 parking slots, limang commercial spaces, limang elevator units, swimming pool, fitness room, function room, roof deck, at indoor at outdoor na tamang lugar para sa iba’t-ibang aktibidad. Sa ibaba nito ay health center na may lawak na 615 metro-kuwadrado, may sewage treatment plant upang matiyak na maging kombinyente ang mga maninirahan.

Bukod dito, pinasinayahan din ang Pedro Gil Health Center na nasa unang palapag ng naturang condominium na magkakaloob sa mga Manilenyo ng mga libreng serbisyo tulad ng laboratoryo, ECG, ultrasound at susunod na ang x-ray machine na ibabahagi ni Cong. Irwin Tieng at ikatlo ay ang pagkakaloob sa ilang piling mga kawani ng Pamahalaang Lungsod ng Maynila sa pinapangarap nilang sariling tirahan.

Giit pa ng alkalde, iwinawasto lamang umano nito ang hindi makatarungang housing program na inilunsad ng dating alkalde at tiniyak niya na magiging patas ang kanyang administrasyon sa pagsasagawa ng sistema ng pa-raffle sa mga kwalipikadong benepisyaryo.

“A fair system to raffle off the units to qualified beneficiaries. The raffle will have zero biases that would give any advantage to anyone with so-called connections to Manila officials,” saad ng alkalde. JR Reyes