MANILA, Philippines – Bagama’t walang nakaaalarma na epekto na nababantayan sa supply ng manok, ang matinding init ay maaaring makaapekto sa paglaki ng manok, ayon sa United Broiler Raisers Association (UBRA) nitong Huwebes.
“Wala kaming nakikitang sakit para sabihin natin na mag-alarma pagdating sa supply ng kinakain nating karne,” ani UBRA President Jay Feliciano sa isang radio interview.
Gayunpaman, binanggit niya ang ilang mga epekto sa manok dahil sa mainit na kondisyon ng panahon, na maaaring magdulot ng pagkaantala sa kanilang paglaki at sa kalaunan ay maaaring magdulot ng artipisyal na kakulangan.
“Ang pangunahing epekto niyan is iyong delay sa paglaki. Magbibilang ka siguro dalawa o apat na araw,” aniya. “Iyong mga dapat 34, 35, nagiging 38. Pero hindi ko nakikitang magiging dahilan siya na magkaroon kami ng kakulangan ng manok,” dagdag ni Feliciano.
Ipinaliwanag niya na ang mga pagkaantala na ito ay maaaring magdulot ng pagbaba ng supply sa mga pamilihan sa loob ng isang araw o higit pa na humahantong sa mga pagbabago sa presyo.
Batay sa monitoring ng UBRA, ang average farmgate price ng manok ay nasa PHP95/per kilo hanggang PHP102/kg.
Nitong Huwebes, ang umiiral na retail price range ng buong manok sa National Capital Region (NCR) ay nakatakda sa PHP150/kg hanggang PHP200/kg, ayon sa Bantay Presyo (price watch) ng Department of Agriculture (DA). Santi Celario
