MANILA, Philippines – Ipinahayag ng Philippine National Police (PNP) na ‘generally peaceful’ ang pagsasagawa ng ikatlong State of the Nation Address (SONA) ni Pangulong Ferdinand Marcos Jr., pero target pa rin nilang sampahan ng mga kaso ang mga protestanteng sumunog sa effigies ng Chief Executive.
“Based sa report ng ating [special task force] ground commander, overall peaceful naman ‘yung ating naging monitoring sa kabuuan ng SONA,” ani PNP spokesperson Police Colonel Jean Fajardo sa isang interbyu.
Iniugnay ni Fajardo ang mapayapang SONA sa pagsisikap ng iba pang kinauukulang ahensya gayundin sa pagsunod ng mga nagpoprotesta at tagasuporta na nagsagawa ng mga rally sa Commonwealth Avenue.
“So far, wala tayong naitala na nanggulo na mga rallyista po, both pro and anti po. At again, we also would like to thank them for honoring ‘yung kanilang ibinigay na salita na magbe-behave naman sila at susunod sila doon sa mga, kung ano yung nakasaad sa permit sa kanila,” ani Fajardo.
Ayon sa tagapagsalita ng PNP, tinatayang nasa 4,500 ang mga dumalo sa pro-administration rally habang nasa 3,000 ang mga anti-administration protesters.
Nang tanungin kung sasampahan ng kaso ang mga nasa likod ng panununog, sinabi ni Fajardo na iniutos ni National Capital Region Police Office (NCRPO) chief Police Major General Jose Melencio Nartatez Jr ang dokumentasyon ng mga insidente bilang pagsunod sa layunin ng Batas Pambansa 880 o ng Public Assembly. Batas ng 1985.
