SSS AT PHILHEALTH NAGLUNSAD NG SARILING TRANSPARENCY PORTAL

SA gitna ng patuloy ng pagharap ng pamahalaan sa malawakang iskandalo sa imprastruktura, ipinaalam ng Department of Information and Communications Technology (DICT) na maglulunsad ito ng mas maraming transparency portal upang masegurong malinaw at maaasahan ang paggamit ng pondo ng publiko.

Kasalukuyang inilunsad na ng Social Security System (SSS) at Philippine Health Insurance Corporation (PHILHEALTH) ang kanilang sari-sariling portals.

Sinabi ni DICT Secretary Henry Aguda na gagamitan ng artificial intelligence (AI) ang mga website upang masubaybayan ng publiko ang mga proyekto at ang halaga ng pondong ginagastos sa bawat isa.

Ayon sa kanya, magiging ka­tulad ang format ng transparency portal sa inilunsad ng Department of Public Works and Highways (DPWH), na na­ging hakbang matapos ang isa sa pinakamalalaking iskandalo sa korapsyon ng nakaraang de­kada. Lumabas noon na ang DPWH ay sentro ng isang malawakang kickback scheme na kinasasangkutan ng mga opisyal at mambabatas.

Ayon sa kalihim, ilang ahensya na ang nagpakita ng interes na magkaroon ng transparency portal, subalit mas mauuna ang mga government-owned o controlled corporations (GOCCs) da­hil mas madali nilang maibigay ang kanilang datos. Kadalasan, ang datos ng GOCC ay naka-di­gital na at nakapasa sa mga regulatory bodies, kaya handa na itong ilagay sa portal.

Hindi lamang pondong ginastos ang ilalagay sa mga transparency portal.

Halimbawa, ang portal ng Department of Education (DEPED) ay inaasahang maglalaman din ng bilang ng mga silid-aralan na itinatayo, habang ang portal ng Department of Health (DOH) ay magpapakita rin ng bilang ng mga pasyente sa mga pampublikong ospital.

Bagama’t hindi nagbigay ng tiyak na petsa si Secretary Aguda kung kailan mailulunsad ang mga portal ng executive agencies, sinabi niyang kasalukuyan silang nakikipag-ugnayan sa DEPED, DOH, at Department of Agriculture upang ma­isakatuparan ito.

Ang hakbang na ito ay bahagi ng mas malawak na kampanya ng pamahalaan upang mapalakas ang transparency, mapanagot ang mga opisyal, at maiwasan ang pag-aabuso sa pondo ng bayan.