MANILA, Philippines- Sumiklab ang sunog sa Philippine General Hospital sa Ermita, Maynila nitong Lunes ng umaga.
Itinaas ng Bureau of Fire Protection (BFP) ang unang alarma ng alas-6:07 ng umaga, at ikalawang alarma pagsapit ng alas-6:21 ng umaga.
Naapektuhan sa sunog ang audio visual room ng ospital gayundin ang Out Patient Department (OPD) ng PGH, ayon sa Bureau of Fire Protection.
Kinailangang ilikas ang mga pasyente sa OPD na ang ilan ay naka-stretcher at wheelchair.
Kinailangan ding ilikas ang blood donors sa kabilang gusali ng compound dahil na rin sa sunog at usok.
Samantala, sinabi ng Department of Health na handa itong tulungan ang PGH sa paglilipat ng mga pasyente kung kinakailangan.
“The Department of Health (DOH) is on standby to receive patient transfers from the UP Philippine General Hospital (UP-PGH) should there be a need. DOH is aware of the ongoing fire incident at its allied hospital, and is giving way for fire personnel to address the situation. We continue to monitor developments,” sabi ng DOH.
“All ambulances inbound to the UP-PGH this morning are advised to coordinate again for possible diversion to other hospitals, including DOH hospitals, to relieve PGH for the meantime,” ayon kay DOH Secretary Teodoro Herbosa .
Idineklarang fire out pasado alas-7 ng umaga.
Ayon sa inisyal na ulat mula sa BFP, nagsimula ang sunog sa isang silid sa ikalawang palapag ng Central Block Building.
Pinayagan ding bumalik ang mga pasyente sa OPD pagtuntong ng alas-7:23 ng umaga. Jocelyn Tabangcura-Domenden
