QUEZON, Philippines – Nasunog ang humigit-kumulang 1,000 square meters ng damuhan matapos ang isang grass fire sa tuktok ng Mt. Banahaw sa Quezon noong Linggo, Marso 29, ayon sa Department of Environment and Natural Resources (DENR).
Sa ulat na isinumite kay DENR Calabarzon director Nilo Tamoria noong Lunes, sinabi ni park superintendent Josephine Barrion na naapektuhan ang mga lugar sa Barangay Masalukot V sa Candelaria at Barangay Concepcion Pinagbakuran sa Sariaya.
“The cause of the fire has not yet been determined,” Barrion said, noting that coordination with the Bureau of Fire Protection (BFP) is ongoing for further investigation and necessary action.
Kinumpirma ni Tamoria na damuhan ang nasunog na lugar. Nagsimula ang sunog noong hapon ng Linggo, at rumesponde ang mga forest ranger at bumbero mula sa Dolores bandang alas-4 ng madaling araw ng Lunes. Ayon sa lokal na pamahalaan ng Dolores, naapula ang apoy dakong alas-10:23 ng umaga.
Habang hindi pa tukoy ang sanhi, may mga haka-haka sa social media na maaaring dulot ito ng mga pumasok sa lugar tulad ng mga deboto o hikers, posibleng dahil sa itinapong sigarilyo o kandila.
May mga naitalang kaparehong insidente noon: noong Marso 2018, higit 35 ektarya ng damuhan ang nasunog sa Mount Masalukot sa Candelaria; noong Abril 2016, mahigit 50 ektarya ng cogon land ang tinupok; at noong Marso 2014, nasira ang bahagi ng Banahaw sa Sariaya, na nakaapekto sa mga endangered na halaman at hayop.
Samantala, pinaalalahanan ng DENR na nananatiling sarado sa publiko ang Mt. Banahaw at Mount San Cristobal sa Quezon at Laguna.
Ayon kay Magtanggol Barrion, mahigpit na ipatutupad ang mga patakaran sa Protected Area Management Office ng Mts. Banahaw–San Cristobal Protected Landscape, lalo na sa Barangays Kinabuhayan at Sta. Lucia sa Dolores.
Ipatutupad ang “no permit, no entry” policy. Sa Semana Santa, gagawing walkable tourist zone ang Kinabuhayan at bawal ang sasakyan maliban sa may dalang mabibigat na kagamitan na dapat umalis agad matapos magbaba.
Magtatalaga rin ng hiwalay na lugar para sa mga relihiyosong grupo at camping sites para sa iba. Reregulahin ang mga vendor. Inaatasan ang mga bisita na magdala ng sariling trash bag at iuwi ang kanilang basura. Sisingilin ng P20 kada tao at P100 kada tent sa Semana Santa.
Isinara ng DENR ang inner sanctuaries ng Banahaw noong 2004 upang makabawi ang kalikasan mula sa matinding pagdagsa ng tao at pagkasira ng kapaligiran. Sa kabila nito, may ilan pa ring pumapasok sa pamamagitan ng mga ilegal na daanan.
Bago ang pagsasara, mahigit kalahating milyong deboto at hikers ang umaakyat sa bundok tuwing Semana Santa, na nag-iiwan ng tone-toneladang basura. RNT/MND
