MANILA, Philippines- Makaraang magtago ng 23 taon bunsod ng kanyang kinahaharap na kasong frustrated homicide sa Baguio City ay nadakip sa ikinasang operasyon ng District Special Operations Unit ng Southern Police District (DSOU-SPD) ang No. 5 most wanted person (MWP) Lunes ng hapon, Mayo 5.
Kinilala ni SPD director P/BGen Joseph Arguelles ang nadakip na suspek na si alyas George, 51, tinaguriang No. 5 MWP sa district level at No. 2 naman sa provincial level ng CIDG Baguio CFU.
Base sa report na natanggap ni Arguelles, naganap ang pagdakip kay alyas George bandang alas-3 ng hapon sa kahabaan ng Lawton Avenue, Barangay Northside, Makati City.
Naipatupad ang pag-aresto ng DSOU sa suspek sa bisa ng isinilbing warrant of arrest sa kasong frustrated homicide sa ilalim ng Criminal Case No. 20631-R.
Ang pagpapatupad ng warrant of arrest ay inisyu noong Setyembre 30, 2002 ni Baguio City Regonal Trial Court (RTC) First Judicial Region Presiding Judge Fernando Wil Pamintuan ng Branch 3 na may kaakibat an rekomendasyon ng piyansa sa halagang P200,000.
Sa pamamagitan ng malalim na intelligence sharing at patuloy na pagsasagawa ng surveillance ng iba’t ibang law enforcement units ay nagresulta sa pagdakip ng suspek na nakapagtago ng mahigit dalawang dekada.
“This operation reflects the commitment and determination of our personnel in ensuring that those who evade justice are eventually held accountable. Capturing a regional most wanted fugitive after 23 years is a clear result of focused work and effective collaboration,” pagtatapos ni Arguelles. James I. Catapusan
