MANILA, Philippines- Bad news ang hatid ng mga kompanya ng langis sa bansa sa mga motorista partikular na sa mga tsuper ng mga pampublikong sasakyan dahil magpapatupad ng dagdag-presyo sa mga produktong petrolyo na magiging epektibo bukas ng umaga.
Sa abiso ng mga kompanya ng langis sa bansa na pinangunahan ng Pilipinas Shell, Petron Corporation, Seaoil, PTT Philippines, Total Philippines, Unioil, Petro Gazz at Phoenix Petroleum, magpapatupad ng dagdag-presyo na P0.40 kada litro ng gasolina at diesel, habang nasa P0.30 naman ang dagdag-presyo sa kada litro ng kerosene na magiging epektibo alas-6 bukas ng umaga.
May dagdag sa presyo ng mga nabanggit na produktong petrolyo sa kahalintulad na halaga ang kompanyang Caltex (CPI) na ipatutupad ng alas-12:01 bukas ng madaling araw habang ang CleanFuel naman ay magpapatupad ng alas-4:01 bukas ng hapon.
Ang ipatutupad na dagdag-presyo sa mga produktong petrolyo ay bunsod ng patuloy na paggalaw ng presyuhan nito sa pandaigdigang merkado.
Matatandaan na nitong nakaraang Martes ay nagpatupad ng bawas-presyo na P0.10 sa kada litro ng gasolina habang dagdag-presyo namang P0.25 sa kada litro ng diesel at P0.30 naman sa kada litro ng kerosene. JAY Reyes
