Inihayag ng National Wages and Productivity Commission (NWPC) na nakatakdang tumanggap ng pagtaas sa kanilang buwanang sahod ang mga domestic worker sa Bangsamoro Autonomous Region in Muslim Mindanao (BARMM) simula sa susunod na Huwebes, Setyembre 19.
Ang Wage Order No. BARMM-DW-01 na inaprubahan ng Bangsamoro Tripartite Wages and Productivity Board (BTWPB) ay nagbibigay ng pagtaas sa buwanang sahod para sa mga kasambahay sa buong rehiyon sa P5,000.
Nalalapat ang bagong wage order sa mga nagsasagawa ng mga gawain sa bahay tulad ng pagluluto, paglilinis, paglalaba, pag-aalaga ng bata, at paghahalaman ngunit hindi umaabot sa mga tsuper ng pamilya, mga bata sa mga foster family arrangements o service providers.
Sinabi ni BARMM Labor Minister Muslimin Sema na ang pagsasaayos ng sahod ay kasunod ng masusing konsultasyon sa mga grupo ng manggagawa at mga stakeholder upang mapabuti ang antas ng pamumuhay ng mga kasambahay.
Higit pa sa pagtaas ng sahod, hinihikayat din ng kautusan ang mga employer na mag-alok ng mga benepisyong panlipunan at mga pagkakataon sa pagsasanay upang palakasin ang pagpapahalaga sa sarili, produktibidad, at kalidad ng serbisyo ng mga manggagawa.
Sinabi pa ni Sema na ang BTWPB ay nagtutulak ng mga karagdagang hakbang upang mapabuti ang mga kondisyon sa pagtatrabaho, ipatupad ang mga pamantayan sa paggawa, at itaas ang kamalayan tungkol sa mga karapatan at proteksyon ng mga domestic worker. (Jocelyn Tabangcura-Domenden)
