MANILA, Philippines- Kinondena ng party-list group Bayan Muna ang pagsasampa ng anti-terrorism charges laban sa secretary general nitong si Nathanael Santiago, maging kkina Anakpawis Campaign Director Servillano Luna, Jr., ASCENT Convenor Rosario Brenda Gonzalez, at Bulacan Ecumenical Forum volunteer Anasusa San Gabriel.
Sinabi ng grupo na ang naturang mga kaso ay “trumped up” at naglalayong i-“demonize” ang mga kritiko ng pamahalaan.
“The use of trumped-up charges, in conjunction with red-tagging, creates a toxic environment that undermines the principles of justice and human rights. We strongly and firmly reject these reprehensible tactics and demand an end to the harassment and persecution of activists and members of the political opposition,” pahayag ng Bayan Muna.
Gayundin, inihayag ng grupo na kasunod ang mga reklamo ng paghahain ng parehong mga kaso laban sa presidente nitong si Satur Ocampo at vice chairperson na si Teddy Casiño.
Sa counter-affidavit na inihain ni Santiago sa Nueva Ecija Office ng Provincial Prosecutor, pinabulaanan niya ang mga reklamong attempted murder at murder sa ilalim ng Anti-Terrorism Act maging paglabag sa Philippine Act on Crimes Against Humanitarian Law, Genocide and other Crimes Against Humanity.
Ani Santiago, sa panhon ng umano’y krimen, nanunungkulan siya bilang Bayan Muna secretary general sa opisina ng party-list group sa Quezon City.
“Napakalaking kasinungalingan, gawa-gawa lamang ang istorya, at hindi totoong nangyari na ako ay kasama o kabahagi sa iniulat ng militar na armadong engkwentro sa pagitan ng AFP at NPA noong Oktubre 8, 2023 sa Laur, Nueva Ecija at sa paratang ng paglabag ng murder, attempted murder at paglban sa batas laban sa pasabot at batas laban sa terorismo,” giit ni Santiago.
Gayundin, sa counter-affidavit ni Gonzalez, sinabi niyang abala siya para sa isang book launch sa unang tatlong linggo ng Oktubre, na may kalakip na mga larawan at testimonya.
“Again, how then could I have been, in any way, part of the alleged encounter when I was busy in Metro Manila championing the causes of the victims of the state’s excesses?” wika ni Gonzalez. RNT/SA
