Testigo laban sa sariling ama bumaligtad; mga dating opisyal sinampahan ng kaso sa piskalya

Ilang dating opisyal ng gobyerno ang sinampahan ng kaso ng dating empleyado ng isang pulitiko sa Quezon dahil sa umano’y panggigipit at pananakot sa kanya.

Sa isang pulong balitaan sa Maynila, kasong paglabag sa Republic Act No. 9516 (Section 4-a) at Republic Act. 10591(Comprehensive Firearms and Ammunition) sa ilalim ng criminal case na planting of evidence ang isinampa ni Jestin Aquino, residente ng Brgy. Tagimbac, Bayambang, Pangasinan sa Office of the Provincial Prosecutor ng San Carlos City, Pangasinan.

Humarap sa media si Jestin kasama ang kanyang mga abogado at ipinakita ang kopya ng kasong kanyang isinampa. Base sa kanyang testimonya, dati umano siyang nagtatrabaho sa dating gobernador ng Quezon na si Danilo Suarez.

Naglakas-loob umano siya na lumutang at magsampa ng kaso laban sa dating gobernador kasama ang sampung iba pa.

Isiniwalat ni Jestin na ginawa umano siyang testigo laban sa kanyang sariling ama na ipinakulong umano ng mga respondent.

Ang ama ni Jestin na si Jaime Aquino ay isang dating mamamahayag na nakulong matapos na makitaan ng granada at baril sa kanilang bahay. Si Jestin ang tumayong testigo laban sa kanyang ama.

Nitong mga nakaraang araw ay nakatanggap umano ng balita si Jestin na may tangka sa buhay ng kanyang ama dahilan para lumantad siya at maglahad umano ng katotohanan na nasaksihan niya mismo na ang mga nakitang armas ay itinanim lang ‘di umano ng awtoridad para masakote ang kanyang ama.

Ani Jestin na nagsisisi na umano siya dahil nabulag lang siya sa galit sa kanyang ama pero hindi niya maatim na mamatay ito.

Dagdag pa niya na maging umano siya ay may nakikita nang mga umaaligid na sasakyan kaya pinangangambahan niya rin ang kanyang buhay.

Dahil dito, nagpasya si Jestin na lumantad at humingi ng tawad sa kanya ng ama sa pagsasangkot sa mga pekeng kaso.

Si Jestin ay lumantad kasama ang kanyang mga abogado na sina Atty. Tanya Lingat at Atty. Charlie Santos. Jocelyn Domenden-Tabangcura