MANILA, Philippines — Iginiit ng dating hepe ng Philippine National Police (PNP) at kasalukuyang General Manager ng Metropolitan Manila Development Authority (MMDA) na si Nicolas Torre III na hindi siya nagsumite o pumirma ng optional retirement mula sa serbisyo ng pulisya.
Sinabi ni Torre ito ngayiong Huwebes matapos niyang inspeksyunin ang isinagawang Bayanihan sa Estero program sa Kalabingkoho River sa Barangay Malanday, Valenzuela City, kasama si Valenzuela City Mayor Wes Gatchalian.
Nang tanungin kung nagsumite ba siya ng optional retirement, sagot ni Torre, “No.”
Dagdag pa niya, wala siyang pinirmahang retirement application at unang pag-uusapan muna ang isyu sa organisasyon.
“I don’t have any applications to sign. So let’s leave it at that for now because my bosses and I will talk first,” ani Torre.
Dumating ang pag-amin matapos lumabas ang General Order No. NHQ-GO-OR-2026-330 na may petsang Jan. 19, na nagsasabing pormal na nagretiro si Torre mula sa serbisyo ng pulisya matapos aprubahan ng National Police Commission (Napolcom).
Ayon sa kautusan, “[Torre] is optionally retired from the PNP service effective Dec. 26, 2025 with 5th [longevity pay] and retirement benefits equivalent to his present rank as approved by the Napolcom Resolution No. 2026-0029 dated Jan. 19, 2026.”
Kasabay nito, inaasahang maipapromote ang acting PNP chief na si Lt. Gen. Jose Melencio Nartatez Jr. bilang police general na may apat na bituin. Dave Baluyot
