Manila, Philippines — Pinuri ni Volunteers Against Crime and Corruption (VACC) Founding Chairman Boy Evangelista si Police Major General Nicolas D. Torre III bilang isa sa mga posibleng susunod na Chief ng Philippine National Police (PNP).
Ani Evangelista, taglay ni Torre ang political will, tapang, at lakas ng loob, kasama ang hands-on na pamumuno at epektibong mga programa kontra-krimen tulad ng police visibility at “five-minute quick response” na kinilala mismo ni Pangulong Ferdinand Marcos Jr.
Binanggit din niya ang inobatibong paggamit ni Torre ng real-time bodycam system bilang dating QCPD Director na nagpapadali ng mabilis na pagtugon sa mga insidente.
Bilang pamantayan ng VACC para sa susunod na PNP Chief, dapat ito ay may moral ascendancy, malinis na rekord, independyente sa pulitika, at may tapang na ipatupad ang merit system sa kapulisan.
“Hindi pwedeng sunod-sunuran sa mga pulitiko,” aniya.
Dagdag pa ni Evangelista, ang bagong hepe ay dapat may integridad, dangal, at takot sa Diyos.
Pinunto rin niya na mahalaga ang tiwala ng Pangulo, ngunit dapat bigyang-priyoridad ang kakayahan at karakter ng susunod na lider.
Habang hinihintay ang pinal na desisyon ni Pangulong Marcos Jr. para sa kapalit ni PNP Chief Gen. Rommel Francisco D. Marbil, ang mga pahayag ni Evangelista ay sumasalamin sa panawagan ng civil society para sa isang lider na may puso, prinsipyo, at malasakit sa bayan. RNT
