QUEZON- Patay ang isang tricycle driver matapos salpukin ang minamaneho nitong tricycle ng pampasaherong bus, hatinggabi sa bayan ng Pagbilao.
Kinilala ang biktimang si Elmer Nataño, 56, at residente ng Barangay Ikirin, sa nasabing bayan.
Batay sa report ng Pagbilao Municipal Police Station, bandang alas-12 ng hatinggabi nitong Martes naganap ang insidente sa kahabaan ng national highway na sakop ng Sitio Highway, Barangay Pinagbayanan, ng naturang bayan.
Lumabas sa pagsisiyasat ng pulisya, binabaybay ng bus na patungong Maynila na minamaneho ng isang Ricky at pagsapit sa pakurbadang bahagi ng nabanggit na kalsada ay bigla na lamang nahagip nito ang sidecar ni Nataño na nasa kabilang linya.
Sa lakas ng pagkakabangga, nagpagewang-gewang ang tricycle ng biktima at tumilapon dahilan para magtamo itong matinding pinsala sa ulo at katawan.
Isinugod naman ng mga rumespondeng awtoridad ang biktima sa ospital subalit sa daan pa lamang ay nalagutan na ito ng hininga.
Inihanda ng mga awtoridad ang mga posibleng kasong Reckless imprudence resulting to homicide na isasampa laban sa suspek. Mary Anne Sapico
