MANILA, Philippines – Kinuwestiyon ni dating Sen. Antonio Trillanes IV ang desisyon ng Senate impeachment court na hindi agad naglabas ng subpoena para sa kanya bilang testigo sa impeachment trial ni Vice President Sara Duterte.
Nauna nang nais ng House prosecution panel na iharap si Trillanes bilang testigo noong Setyembre 30. Ngunit hiniling ni Senate impeachment court presiding officer Francis Escudero na unahin muna ang testigo mula sa Anti-Money Laundering Council (AMLC), at sinabing hindi dapat “cart be put ahead of the horse.”
Ayon kay Trillanes, siya lamang ang hindi nabigyan ng subpoena matapos maibalik ang iba pang subpoena.
“Ganito kasimple: my name was there. Bumalik yung mga subpoena, ako lang wala. Bakit hindi po nag-issue ng subpoena yung presiding officer? The signal is clear, hindi ako welcome,” ani Trillanes.
Sinabi rin niyang hindi kabilang si Sen. Alan Peter Cayetano sa mga senator-judge na tumutol sa subpoena.
“To be fair to my ex-good friend and colleague, hindi naman siya kumontra,” ani Trillanes.
Hindi naman nagbigay si Trillanes ng direktang sagot sa kanyang hinala kung bakit hindi siya pinadalhan ng subpoena ni Escudero. Aniya, maaaring may iba pang dahilan ngunit ayaw muna niyang talakayin ito.
Kinuwestiyon din ni Trillanes ang paraan ng pagpapatakbo sa impeachment proceedings at sinisi si Escudero sa naging takbo nito.
“Kung magaling-galing lang ang nagpe-preside diyan, dapat liberal. Hindi naman ito criminal trial na may kulong,” ani Trillanes.
“Yung presiding officer yung nagtitimon. Kung boring yung impeachment trial, it’s entirely the fault of the presiding officer.”
Samantala, itinanggi ni impeachment court spokesperson Reginald Tongol na “not welcome” si Trillanes sa Senado. Sinabi niyang nakapasok pa nga ang dating senador noong Martes at naupo sa main gallery na nakalaan para sa mga very important persons.
“Walang pagpipigil po dahil ready naman po ang impeachment court para doon sa kanyang mga testimonya,” ani Tongol.
Ipinaliwanag din ni Tongol na kailangang may sapat na paghahanda ang court staff bago iharap ang isang testigo, lalo na kung may dalang mga dokumento.
“Yung narrative ninyo, gusto niyo na mayroong underhanded na nangyari? Wala po talaga. Kung anong sinabi ko, yun lang yun,” dagdag ni Tongol.
Nananatili namang nasa House prosecution panel ang desisyon kung boluntaryo nitong ihaharap si Trillanes bilang testigo. RNT/MDS
