MANILA, Philippines – Tinuligsa ni Tingog party-list Rep. Jude Acidre ang mga paratang na ginagamit ang mga government medical assistance programs bilang political patronage.
Ayon kay Acidre, kailangan ang mga programang ito dahil sa limitadong saklaw ng PhilHealth, lalo na para sa mga pasyenteng may malubha at magastos na sakit.
Batay sa datos mula sa Eastern Visayas Medical Center (EVMC), saklaw ng PhilHealth ang 70–74% ng hospital bills na mababa sa P50,000, ngunit bumababa nang husto kapag mas mataas ang gastos.
Aniya, “the more serious the illness becomes, the thinner the protection actually gets,” kaya labis ang epekto sa mga pasyenteng sumasailalim sa cancer treatment, extended ICU, dialysis, o major surgery.
Dagdag pa niya, dumoble ang pasyenteng dumarating sa EVMC sa nakalipas na apat na taon dahil sa pagtaas ng gastos sa private healthcare, ngunit ang PhilHealth reimbursements ay bahagyang tumaas lamang, na may pansamantalang spike noong 2022 dahil sa COVID-19.
Ipinaliwanag ni Acidre na ang medical assistance programs ay nagtataguyod upang punan ang kakulangan ng insurance, at kung wala ito, maaring hindi makagamot ang mahihirap na pasyente dahil sa natitirang bayarin.
Binanggit din niya na ang MAIFIP program ay hindi nangangailangan ng political endorsement; nakabase ang eligibility sa medical need at financial incapacity, at ipinoproseso sa pamamagitan ng hospitals at implementing agencies.
Pinagtanggol din niya ang pagkasama ng professional fees sa medical assistance, dahil mahalaga ang mga doktor sa pagbibigay ng serbisyong pangkalusugan, lalo na sa mga public hospital na kulang sa espesyalista.
Bagama’t aminado sa hindi perpektong sistema, sinabi ni Acidre na ang pangmatagalang layunin ay mas malawak at komprehensibong PhilHealth coverage para maging exception na lamang ang medical assistance.
Aniya, “refusing assistance does not protect dignity—it abandons patients,” at para sa maraming pamilya sa EVMC, ang medical assistance ay “about survival, not politics.” RNT/MND
