MAGUINDANAO DEL SUR, Philippines – Nakamit ng Philippine Army nitong Martes ang isang kasunduan sa kapayapaan sa pagitan ng dalawang MILF commanders, na nagwakas sa sampung taong alitan ng pamilya sa Maguindanao del Sur.
Ayon kay Brig. Gen. Edgar Catu, commander ng 601st Infantry Brigade, pumayag ang magkabilang panig na talikuran ang karahasan at ayusin ang kanilang mga alitan sa teritoryo at personal sa pamamagitan ng mapayapang usapan sa bayan ng Ampatuan.
Bilang patunay ng kanilang sinceridad, isinuko ng mga commander ang siyam na high-powered firearms, kabilang ang dalawang homemade Barrett .50 sniper rifles, at nanumpa sa Quran na susundin ang kasunduan. Kinilala ang mga commander bilang Maki Dumpao at Datu Baks “Sangki” Kindo.
Ang huling sagupaan ng kanilang mga pamilya ay nangyari noong Disyembre 10 sa Barangay Timbangan, Shariff Aguak.
Nagbabala si Catu na hindi mag-aatubiling gumamit ng puwersa ang Army upang protektahan ang sibilyan kung mauulit ang karahasan.
Pinuri naman ni Maj. Gen. Vladimir Cagara, commander ng 6th Infantry Division, ang magkabilang pamilya sa pagpili ng mapayapang dialogo. RNT/MND
