MANILA, Philippines – Ibinida ni Pangulong Ferdinand Marcos Jr. nitong Sabado, Enero 17 ang nagpapatuloy na upgrade ng pamahalaan at pribadong sektor sa mga paliparan sa bansa, kabilang ang pagpapasinaya sa bagong eroplano ng Philippine Airlines na Airbus A350-1000.
Sa event na ginanap sa Villamor Air Base sa Pasay City, sinabi ni Marcos na kasalukuyang isinasagawa ang konstruksyon at upgrade projects sa ilang provincial airports.
Under construction na ang isang modular passenger terminal building (PTB) sa Siargao Airport sa Surigao del Norte, habang nagtatayo rin ng bagong international PTB sa Davao International Airport sa Davao City.
Nagpapatuloy din ang airport upgrades sa pakikipagtulungan sa pribadong sektor sa Laguindingan Airport sa Misamis Oriental, Bohol-Panglao Airport sa Bohol, at Caticlan Airport sa Aklan.
Tinukoy ng Pangulo ang modernisasyon sa Manila International Airport sa ilalim ng public-private partnership, kasabay ng pagbibida sa mga ipinakilalang bagong pasilidad at immigration e-gates noong Disyembre.
“While airlines move people, the government ensures that those pathways remain strong and clear. These are our investments in mobility, in opportunity, and in national progress,” ani Marcos.
“These (upgrades) are our investments in mobility, in opportunity, and in national progress,” dagdag pa niya.
Nangako si Marcos na patuloy nitong pauunlarin ang mga paliparan, pagsiguro ng connectivity at pagpapalakas sa ekonomiya.
“I also encourage our private partners to continue working with us. Build on aviation-centered initiatives that will sharpen the Philippines’ competitiveness and open more doors for our people,” dagdag pa niya.
Kasabay ng event, pinuri ni Marcos ang Philippine Airlines sa kontribusyon nito sa Philippine aviation at sinabing ang A350-1000, ang kauna-unahan sa Southeast Asia at ika-10 sa buong mundo.
“The unveiling of the Airbus A350-1000 underscores the importance of keeping pace with a rapidly evolving aviation industry. These milestones point us firmly towards the future. They strengthen our aviation sector, expand connectivity, and open doors to trade, tourism, and investment,” sinabi ni Marcos. RNT/JGC
