MANILA, Philippines – Pinagaan ng South Korea ang visa application requirements para sa mga turistang Pilipino upang gawing mas maginhawa ang proseso at mahikayat ang mas maraming bumisita sa bansa.
Ayon sa Korea Visa Application Center (KVAC) sa Pilipinas, ipatutupad ang mga binagong requirements simula Biyernes, Pebrero 20, “to enhance convenience for visa applicants and promote visits to Korea.”
Kabilang sa mga pagbabago ang hindi na paghingi ng three-month bank statement. Para naman sa mga student applicants, papayagan nang magsumite ng alinman sa original school certificate o kopya ng student ID bilang patunay ng student status, sa halip na parehong dokumento.
Para sa mga group o multiple applicants, kinakailangan lamang magsumite ng isang kopya ng common documents tulad ng invitation letter, family relationship documents, o company-related documents, na ilalakip sa file ng representative applicant.
Inalis na rin ang requirement ng explanation letter para sa employment-related documents kung walang landline number o kung may electronic signature ang dokumento.
“As long as other reachable contact information (email address or mobile phone number) is provided, the document will be accepted,” ayon sa KVAC. Dave Baluyot
