VP Sara ‘di nag-iisa; 2014 OVP confidential fund iprinisenta ng Depensa

MANILA, Philippines — Nagharap nitong Martes ang depensa ni Vice President Sara Duterte ng isang budget document noong 2014 upang kontrahin ang pahayag na ang kaniyang tanggapan lamang ang nakatanggap ng confidential funds.

Sa cross-examination kay Commission on Audit auditor Roderick Wamil, ipinakita ni defense lawyer Atty. Michael Poa ang Special Allotment Release Order na may petsang Disyembre 22, 2014.

Pinahintulutan sa dokumento ng Department of Budget and Management ang pagpapalabas ng pondo sa Office of the Vice President “to cover confidential activities for Fiscal Year 2014.”

Nauna nang tumestigo si Wamil na si Duterte lamang ang bise presidenteng may confidential funds na kaniyang na-audit habang nakatalaga siya sa COA Intelligence and Confidential Funds Audit Office mula Setyembre 2014 hanggang Pebrero 2024.

Sa naturang panahon, nagsilbi bilang bise presidente sina dating Vice Presidents Jejomar Binay at Leni Robredo, gayundin si Duterte.

“Tanging si Vice President Sara Duterte lang po ’yung aking na-audit na may confidential fund,” ani Wamil.

“Dahil po since nung nag-assume po ako nung 2014 sa ICFAO, wala pong naging appropriation for confidential funds si dating Vice President Binay at si dating Vice President Robredo. Tanging si Vice President Sara Duterte lang yung nagkaroon ng appropriation for the confidential funds,” dagdag niya.

Iginiit ni Poa na patunay ang 2014 SARO na nakatanggap na ang OVP ng confidential fund release bago pa man manungkulan si Duterte noong 2022.

“Maybe you were not just aware [of the 2014 SARO] yesterday when your were asked the question,” sinabi ni Poa kay Wamil.

“I just wanted to put that on record because marami na rin pong lumalabas sa social media na si Vice President Sara Duterte lang ang vice president na nagkaroon ng confidential funds,” dagdag niya.

Binanggit din ni Poa ang 1992 COA circular na naglalarawan sa intelligence at confidential activities bilang “highly sensitive and confidential operations or missions the details of which cannot be divulged without posing a threat to national security or to the success of the mission.”

Gayunman, sinabi ni private prosecution counsel Lorna Kapunan na napalitan na ng 2015 joint circular na binanggit ni Wamil ang 1992 issuance. RNT