MANILA, Philippines – Humiling si Vice President Sara Duterte sa Korte Suprema ng temporary restraining order (TRO) upang mapigilan ang House of Representatives at ang House justice committee sa pagpapatuloy ng impeachment hearings laban sa kanya.
Sa 58-pahinang petition for certiorari na may petsang Marso 30, iginiit ni Duterte na labag sa Konstitusyon ang mga proceedings at magbubunga ito ng “a miscarriage of justice and a mockery of processes that our Constitution and laws have always aimed to protect.”
Pinangalanan sa petisyon bilang respondents ang House of Representatives na kinakatawan ni Speaker Faustino Dy III, ang House justice committee na kinakatawan ni Rep. Gerville Reyes-Luistro, ang Senado na kinakatawan ni Senate President Vicente Sotto III, at ang 14 na indibidwal na naghain ng dalawang impeachment complaint laban sa bise presidente.
Humirit din si Duterte ng writ of preliminary injunction upang ipahinto ang “any trial, mini-trial, or so-called preliminary investigation, issuance and enforcement of compulsory processes, and such other acts or incidents.”
Hiniling din ng bise presidente sa High Court na ideklarang walang bisa at unconstitutional ang Sections 7 at 8 ng Rules of Procedure in Impeachment Proceedings ng 19th Congress, gayundin ang guidelines ng House justice panel. Nais din niyang mapawalang-bisa ang impeachment proceedings kaugnay ng mga reklamong inihain nina Saballa at Cabrera at mapigilan ang House at Senado sa pagsasagawa ng anumang hakbang kaugnay nito.
Sa kanyang petisyon, sinabi ni Duterte na walang kapangyarihan ang House justice panel na magsagawa ng aniya’y trial in disguise.
“It is evident that the proceedings before the respondent committee are, in truth and substance, a trial in disguise. Its members’ use of various nomenclatures such as ‘mini-trial,’ ‘hearing proper’ or a ‘process akin to a preliminary investigation’ does not change its true nature,” ayon sa petisyon.
Binigyang-diin din niya na ang pagpayag sa panel na gawin ito ay magbibigay-daan upang “circumvent the limits of their function and usurp the prerogatives of the impeachment court solely vested in the Senate acting as such.”
Iginiit din ni Duterte na walang due process, walang “ultimate facts” sa mga impeachment complaint, at kulang ang mga alegasyon laban sa kanya—kabilang ang umano’y misuse of confidential funds, non-declaration of assets, abuse of power, at umano’y pagbabanta kay Pangulong Ferdinand Marcos Jr.—upang umabot sa antas ng mga impeachable offense sa ilalim ng Konstitusyon.
Aniya, nilabag din ang one-year bar rule at walang balidong referral ng mga reklamo sa House justice committee dahil walang ginawang deliberasyon ang House plenary. Santi Celario
