MANILA, Philippines – Magpapatuloy si Vice President Sara Duterte sa kanyang mga tungkulin habang ang kanyang mga abogado ang dadalo sa impeachment trial para sa kanya, ayon sa kanyang defense team.
Ayon kay Defense Deputy Spokesperson Atty. Justin Nicol Gular noong Setyembre 2, ipinagkatiwala ni Duterte sa kanyang mga abogado ang pagdalo sa mga paglilitis upang maipagpatuloy niya ang kanyang trabaho bilang Bise Presidente.
“The Vice President has entrusted to the defense team the duties of attending the impeachment trial,” ani Gular.
Sinabi niyang mahirap para kay Duterte na palaging manatili sa impeachment court dahil marami rin siyang responsibilidad bilang Bise Presidente.
“Marami rin trabaho ang Bise Presidente natin. Mahirap naman po kung ang Bise Presidente natin ay, you know, at all times, nandito sa impeachment court,” ani Gular.
Gayunman, sinabi niyang personal na dadalo si Duterte kung kakailanganin.
“If kinakailangan, a-attend naman po si Bise Presidente,” aniya.
Ayon kay Gular, layunin ng hakbang na matiyak na patuloy na makapaglilingkod si Duterte sa publiko habang nagpapatuloy ang impeachment proceedings.
“The only reason why the Vice President entrusted the defense team to attend the impeachment trial is to ensure that she is able to continue to serve the public as the Vice President of our nation,” ani Gular.
Dagdag niya, pinapayagan ng impeachment rules na kumatawan ang mga abogado kay Duterte sa mga proceedings at may ganito ring naging kaayusan sa mga nakaraang impeachment trial.
“The Vice President is not required to personally attend the trial,” ani Gular.
Samantala, iniulat na dumalo si Duterte sa isang espesyal na Holy Mass kasama ang mga Bicolano Catholic devotees sa Peñafrancia Basilica Minore sa Naga City noong Setyembre 1 bilang bahagi ng pagsisimula ng taunang Peñafrancia festivities. RNT/MDS
