VATICAN CITY – Itim na usok ang lumabas mula sa tsimenea ng Sistine Chapel nitong Huwebes, na hudyat na wala pang bagong Papa matapos ang ikalawang botohan sa conclave.
Nagsimula ang 133 kardinal na wala pang 80 taong gulang sa kanilang lihim na halalan nitong Miyerkules upang pumili ng kahalili ni yumaong Pope Francis.
Sinusunog ang mga balota na may kemikal—itim na usok kung walang napili, puti kung may bagong Papa na. Matapos ang hindi matagumpay na unang botohan noong Miyerkules ng gabi, nagpapatuloy ang pagboto ng mga kardinal ngayong Huwebes, at inaasahang may karagdagang usok sa hapon.
Bagamat karaniwan nang walang napipiling Papa sa unang botohan, ayon sa kasaysayan ay posibleng magkaresulta sa ikalawang araw—tulad nina Pope Francis noong 2013 at Benedict XVI noong 2005. RNT
