MANILA, Philippines – Nasa 53 test takers ang nakapasa sa special professional licensure examination (SPLE) para sa master plumbers habang walang nakapasa sa SPLE para sa customs brokers na ibinigay noong nakaraang buwan.
Ayon sa Professional Regulation Commission, wala sa mga examinees ang nakapasa sa customs brokers special professional licensure exam na ibinigay ng Board for Customs Brokers sa Jeddah, Saudi Arabia at Salmiya, Kuwait noong Hunyo.
Sa hiwalay na pahayag, sinabi ng PRC na 53 mula sa 104 ang nakapasa sa SPLE para sa master plumbers na ibinigay ng Board for Master Plumbers sa Abu Dhabi at Dubai, United Arab Emirates; Al-Khobar, Jeddah at Riyad, Saudi Arabia; Doha, Qatar; Manama, Bahrain; Salmiya, Kuwait; Singapore at Taipei, Taiwan noon ding Hunyo.
Si Victor Rafael Seciban Ngo ng Mindanao State University-Iligan Institute of Technology ang topnotcher na nakakuha ng score na 87.30%. Jocelyn Tabangcura-Domenden
