Welga para sa kinabukasan: 2-araw na transport strike, umarangkada na

MANILA, Philippines – Umarangkada na nitong Huwebes ang dalawang araw na nationwide strike bilang protesta sa tumataas na presyo ng langis dulot ng tensyon sa Middle East.

Nakiisa sa mass action ang mga transport worker mula sa iba’t ibang sektor kabilang ang jeepney, transport network vehicle services, motorcycle taxi, bus, at UV Express.

“Ramdam na ramdam ng mga drayber at ng kanilang mga pamilya ang krisis sa kanilang kumakalam na sikmura, at ramdam din ito ng bawat komyuter na wala nang masakyan sa kalsadang nagsisilagasan na ang mga pumapasadang tsuper,” pahayag ng PISTON.

Isa sa pangunahing protest gathering sa Metro Manila ay isinagawa sa kahabaan ng Aurora Boulevard sa Cubao, Quezon City, kung saan nagsimula ang programa ng No To Oil Price Hike Coalition alas-6 ng umaga. Nagtalaga rin ng iba pang strike center sa National Capital Region at sa iba pang rehiyon.

Panawagan ng koalisyon ang pagtanggal ng value-added tax at excise tax sa mga produktong petrolyo, pagpapatupad ng rollback ng presyo ng langis sa P55 kada litro, at pagbabasura sa Oil Deregulation Law.

Iginiit din ng grupo ang pagtataas ng pasahe sa lahat ng uri ng transportasyon, P1,200 family living wage, at nationalization ng oil industry upang direktang makabili at makapagbenta ang gobyerno ng murang langis.

Ayon sa koalisyon, kailangang matigil ang mga digmaan upang mapigilan ang patuloy na pagtaas ng presyo ng langis. Samantala, naghanda ang iba’t ibang ahensya ng gobyerno ng libreng sakay para sa mga commuter na maaapektuhan ng welga. Santi Celario