MANILA, Philippines – Maaaring magkaroon pa ng dagdag na kaso ng hantavirus matapos pumatay ang sakit ng tatlong pasahero mula sa isang cruise ship, ayon sa
World Health Organization (WHO).
Gayunpaman, inaasahan nilang limitado lamang ang outbreak kung susundin ang mga tamang pag-iingat.
Isa pang maysakit na pasahero mula sa MV Hondius ang dumating sa Europa noong araw ding iyon, habang patungo ang barko sa Spanish Canary Islands.
Nagsusumikap ang mga health official na subaybayan ang outbreak ng potensyal na nakamamatay na strain na maaaring maipasa mula sa tao patungo sa tao.
Nagdulot ng pandaigdigang pagkabahala ang sitwasyon ng Hondius matapos mamatay ang tatlong pasahero nito.
Gayunpaman, sinabi ng mga health official na mababa ang posibilidad ng mas malawak na global outbreak dahil ang rat-borne virus na ito ay hindi kasing nakakahawa ng Covid-19.
Ayon kay WHO chief Tedros Adhanom Ghebreyesus, may limang kumpirmado at tatlong hinihinalang kaso, kabilang ang tatlong nasawi.
Inanunsyo rin ng Leiden University Medical Centre sa Netherlands na may isa pang pasyenteng nagpositibo, sinabi naman ni Abdi Rahman Mahamud, direktor ng emergency alert and response ng WHO.
Ang mga taong pinaghihinalaang nahawa ay ginagamot o naka-isolate sa Britain, Germany, Netherlands, Switzerland, at South Africa.
Ang hantavirus ay isang bihirang sakit sa paghinga na karaniwang naipapasa mula sa mga infected na daga.
Maaari itong magdulot ng respiratory at cardiac distress, pati na rin ng haemorrhagic fevers. Wala pang bakuna o kilalang lunas para dito.
Pinaniniwalaang isang pasahero ang nahawa ng virus bago sumakay ng barko sa Argentina at kalaunan ay naipasa ito sa iba pang pasahero habang naglalakbay sa Atlantic.
Tatlong evacuee ang inalis mula sa barko noong Miyerkules nang ito ay dumaan sa Cape Verde, habang isa pang pasahero ang dumating sa Amsterdam nitong Huwebes, ayon sa operator ng barko na Oceanwide Expeditions na nakabase sa Netherlands.
Ang MV Hondius, na may 149 sakay kabilang ang 88 pasahero, ay nakatakdang dumating sa Netherlands ngayong Linggo, kung saan ang mga pasahero ay ililikas.
Samantala, balak ng mga opisyal sa Argentina na magsagawa ng pagsusuri sa mga daga sa lungsod ng Ushuaia, kung saan nagsimula ang biyahe ng barko noong Abril 1. Jocelyn Tabangcura-Domenden
