MANILA, Philippines – Patuloy na pinalalawak ng Department of Labor and Employment (DOLE) ang mga youth employability program nito, ayon sa mga prayoridad ng administrasyon ni Pangulong Ferdinand R. Marcos Jr.
Sa ika-124 na Araw ng Paggawa, pormal na pinirmahan ng DOLE at Department of Health (DOH) ang kasunduan para sa deployment ng 5,000 interns sa ilalim ng Government Internship Program (GIP) sa mga opisina ng DOH.
Layunin nitong bigyan ang mga benepisyaryo ng kasanayan, karanasan, at oportunidad sa serbisyo ng gobyerno.
Sa General Santos City, pararangalan din ang mga benepisyaryo ng GIP, Special Program for Employment of Students (SPES), at JobStart Philippines sa pamamagitan ng plaques of appreciation.
Bukod dito, pipirma ang DOLE ng Memorandum of Agreement (MOA) kasama ang Civil Service Commission (CSC) para sa job fairs at employment facilitation activities, na magpapalawak sa access ng mga Pilipino sa trabaho sa pampublikong sektor.
Ang CSC ay magbibigay ng impormasyon ukol sa eligibility requirements, training, exam schedules, at job vacancies bilang bahagi ng one-stop-shop services sa mga job fair.
Kasama rin sa partnership ang taunang job fairs tuwing Civil Service Month, CSC participation sa government service hubs, at pagsasama ng PhilJobNet registration, reports consolidation, at promotion ng job fair schedules.
Dagdag pa rito, magbibigay ang DOLE ng livelihood at emergency employment assistance sa mga manggagawang nangangailangan sa ilalim ng DOLE Integrated Livelihood and Emergency Employment Program (DILEEP), bilang suporta sa kita at tulong sa epekto ng energy emergency. Jocelyn Tabangcura-Domenden
